انتخابی اصلاحات کی پارلیمانی کمیٹی کی سربراہی پر پیپلز پارٹی کا تحریک انصاف کو نئی پیشکش

 پارلیمانی کمیٹی برائے انتخابی اصلاحات کی تشکیل اور سربراہی کے معاملے پر سیاسی جماعتوں کے درمیان مشاورت جاری ہے، اس سلسلے میں پیپلز پارٹی نے تحریک انصاف کو کمیٹی کا حصہ بننے اور سربراہی کے معاملے پر ایک نئی تجویز پیش کر دی ہے۔پارلیمانی ذرائع کے مطابق پیپلز پارٹی پارلیمانی کمیٹی کی مستقل سربراہی کے معاملے پر لچک دکھانے کے لیے تیار ہے اور اس نے تجویز دی ہے کہ کمیٹی کی سربراہی باری باری تمام سیاسی جماعتوں کو سونپی جائے۔ اس پیشکش کا مقصد کمیٹی کی تشکیل اور اس کی قیادت کے معاملے پر اتفاق رائے پیدا کرنا ہے۔ذرائع کے مطابق حکومت اور پیپلز پارٹی کے درمیان ہونے والے مذاکرات میں پارلیمانی کمیٹی کی سربراہی پیپلز پارٹی کو دینے پر اتفاق ہوا تھا، تاہم اب پیپلز پارٹی نے اپنی سابقہ پوزیشن میں لچک کا عندیہ دیتے ہوئے تمام جماعتوں کو باری باری سربراہی دینے کی پیشکش کی ہے۔پارلیمانی ذرائع کا کہنا ہے کہ 30 رکنی پارلیمانی کمیٹی میں تمام سیاسی جماعتوں کو ان کی پارلیمانی عددی قوت کے تناسب سے نمائندگی دی جائے گی۔ دوسری جانب تحریک انصاف نے کمیٹی میں حکومت کے برابر نمائندگی دینے کا مطالبہ کر رکھا ہے۔ذرائع کے مطابق تحریک انصاف پیپلز پارٹی کی نئی تجویز اور پارلیمانی کمیٹی کا حصہ بننے کے معاملے پر پارٹی کی سطح پر مشاورت کرے گی، جس کے بعد اپنے مو¿قف اور آئندہ لائحہ عمل سے آگاہ کیا جائے گا۔انتخابی اصلاحات کے لیے مجوزہ پارلیمانی کمیٹی کی تشکیل، جماعتوں کی نمائندگی اور سربراہی کا معاملہ سیاسی مشاورت کا اہم موضوع بن گیا ہے، جبکہ کمیٹی کی تشکیل کے حوالے سے حتمی پیش رفت تحریک انصاف کے جواب اور دیگر جماعتوں کے درمیان اتفاق رائے سے مشروط ہے۔