World News

ایران جنگ کو طویل نہیں ہونے دینا چاہتا، مذاکرات ناکام ہوئے تو فوجی کارروائی کرنا پڑ سکتی ہے، ٹرمپ

امریکی صدر ڈونلڈ ٹرمپ نے کہا ہے کہ وہ ایران کے ساتھ جنگ کو ویتنام جنگ کی طرح طویل نہیں ہونے دینا چاہتے۔ ایران معاہدہ کرنا چاہتا ہے، تاہم دیکھنا ہوگا کہ ایسا ممکن ہو پاتا ہے یا نہیں۔ ٹرمپ کا کہنا تھا کہ ایران پر ابھی فیصلہ کن ضرب نہیں لگائی گئی کیونکہ وہ امریکا کے ساتھ مذاکرات کرنا چاہتا ہے۔ مذاکرات ناکام ہوئے تو ایران کے خلاف فوجی کارروائی کرنا پڑ سکتی ہے۔ امریکی صدر نے کہا کہ اصل مسئلہ یہ طے کرنا ہے کہ ایران میں کس فریق کے ساتھ مذاکرات کیے جائیں۔ ان کے مطابق ایران کو ایٹمی ہتھیار بنانے سے روکنے کے لیے وہاں حکومت کی تبدیلی ضروری نہیں۔ ڈونلڈ ٹرمپ نے دعویٰ کیا کہ ایران شدید بحران کا شکار ہے اور فوجی اہلکاروں کو تنخواہیں دینے کے قابل بھی نہیں رہا۔