Sports

ویرات کوہلی نیوزی لینڈ کے خلاف سیریز میں سچن ٹنڈولکر کے تین ریکارڈ توڑنے کے قریب

بھارتی کرکٹ ٹیم کے اسٹار بیٹر ویرات کوہلی کے پاس نیوزی لینڈ کے خلاف آئندہ ون ڈے سیریز میں سابق بھارتی کپتان سچن ٹنڈولکر کے تین اہم ریکارڈ اپنے نام کرنے کا موقع ہے۔ دونوں ٹیموں کے درمیان پانچ میچوں کی سیریز 4 سے 15 نومبر تک کھیلی جائے گی، جس میں کوہلی کئی انفرادی سنگ میل عبور کرسکتے ہیں۔ پہلا ریکارڈ لسٹ اے کرکٹ میں سب سے زیادہ سنچریوں کا ہے۔ ویرات کوہلی اور سچن ٹنڈولکر دونوں اب تک 60، 60 سنچریاں بنا چکے ہیں۔ ایک اور سنچری اسکور کرکے کوہلی اس فہرست میں ٹنڈولکر سے آگے نکل سکتے ہیں۔ دوسرا ریکارڈ ون ڈے انٹرنیشنل کرکٹ میں رنز کا تعاقب کرتے ہوئے سب سے زیادہ رنز بنانے کا ہے۔ کوہلی اب تک 8 ہزار 667 رنز بنا چکے ہیں، جبکہ سچن ٹنڈولکر کے رنز کی تعداد 8 ہزار 720 ہے۔ یہ ریکارڈ توڑنے کے لیے کوہلی کو مزید 54 رنز درکار ہیں۔ تیسرا ریکارڈ سینا (CENA) ممالک، یعنی جنوبی افریقا، انگلینڈ، نیوزی لینڈ اور آسٹریلیا کے خلاف 50 یا اس سے زائد رنز کی اننگز کھیلنے کا ہے۔ کوہلی اور ٹنڈولکر دونوں یہ کارنامہ 133، 133 مرتبہ انجام دے چکے ہیں۔ نیوزی لینڈ کے خلاف سیریز میں ایک اور نصف سنچری یا اس سے بڑی اننگز کھیل کر کوہلی اس ریکارڈ میں بھی ٹنڈولکر کو پیچھے چھوڑ سکتے ہیں۔